14 އަހަރަށް ފަހު ބަތަލާ ޝިލްޕާ ޝެއްޓީ ކުޅުނު ފިލްމު "ހަންގާމާ 2" އަށް ބޮޑު ގެއްލުމެއް ލިބި، އޭނާގެ ކުރިއަށް އޮތް ފިލްމު ފަސްކޮށްފި އެވެ.
"ހަންގާމާ 2" ސްޓްރީމް ކުރަން ފެށީ ޑިޒްނީ + ހޮޓްސްޓާ ގައި މިމަހުގެ 23 ވަނަ ދުވަހު އެވެ. އޭގެ ކުރިން މިމަހުގެ 19 ވަނަ ދުވަހު ޝިލްޕާގެ ފިރިމީހާ ރާޖް ކުންދުރަ ވަނީ ބަރަހަނާ ވީޑިއޯ އުފެއްދުމާއި އާންމު ކުރުމުގެ ކުށުގައި ހައްޔަރު ކޮށްފަ އެވެ.
ކުންދުރަ ހައްޔަރު ކުރުމާއިއެކު ޝިލްޕާއަށްވެސް ބޮޑެތި ފާޑުކިޔުންތަކެއް އަމާޒުވި އެވެ. އޭނާ ފުލުހަށް ހާޒިރުކޮށް ސުވާލުވެސް ކުރި އެވެ. އެހެންނަމަވެސް ޝިލްޕާގެ ބައިވެރިވުމެއް އެކަމުގައި އޮތްކަން މިހާތަނަށް ހާމަވެފައެއް ނުވެ އެވެ.
ޝިލްޕާގެ ފިރިމީހާގެ މައްސަލަ ފެންމަތިވުމާއިއެކު "ހަންގާމާ 2" ބޮއިކޮޓް ކުރަން ސޯޝަލް މީޑިއާގައި ބޮޑު ކެމްޕެއިނެއްވެސް ހިންގި އެވެ. އެހެންނަމަވެސް ޑިޒްނީ + ހޮޓްސްޓާއިން އެކަން މާ ސީރިއަސްކޮށް ނަގާފައެއް ނުވެ އެވެ. މައުލޫމާތު ލިބޭ ގޮތުގައި "ހަންގާމާ 2" އަށް 15 އިންސައްތައިގެ ވިއުޒް ވަނީ ގެއްލިފަ އެވެ.
މީގެ ކުރިން އުއްމީދު ކުރެވިފައި އޮތީ 14 އަހަރަށްފަހު ޝިލްޕާ ކުޅޭ ފުރަތަމަ ބޮލީވުޑް ފިލްމަށް ބޮޑު ތަރުހީބެއް ލިބޭނެ ކަމަށެވެ. ކުންދުރަ ހައްޔަރު ކުރުމުގެ ކުރިން ޝިލްޕާ ވަނީ އިތުރު ފިލްމަކަށްވެސް ސޮއި ކޮށްފަ އެވެ. "ނިކައްމާ" ނަމަކަށް ކިޔާ މި ފިލްމުގެ ޝޫޓިންވެސް ގާތްގަނޑަކަށްހެން ވަނީ ނިމިފަ އެވެ.
މިހާރު ޕޯސްޓް ޕްރޮޑަކްޝަން މަސައްކަތްތައް ކުރިއަށްދާ "ނިކައްމާ" ރިލީޒް ކުރަން މި އަހަރަށް ތާވަލުކޮށްފައި ވީނަމަވެސް އެ ފިލްމު ޕްރޮޑިއުސް ކުރި ސޮނީ ޕިކްޗާޒްއިން ވަނީ އޭގެ ރިލީޒިންގް މިހާރު ފަސްކޮށްފަ އެވެ. ރިލީޒް ކުރާނެ ސީދާ ތާރީހެއް އިއުލާން ކޮށްފައެއް ނުވެ އެވެ.
