ޑިޒްނީ ޕްލަސް ހޮޓްސްޓާ ގެ ސީރީޒް "ރޫދްރަ – ދަ އެޖް އޮފް ޑާކްނެސް" ގައި އެކްޓަރު އަޖޭ ދޭވްގަންއާއެކު ފެނިގެން ދާނީ ސައުތު އިންޑިއާގެ ބަތަލާ ރާޝީ ކައްނާ ކަމަށް ރިޕޯޓުތައް ބުނެފި އެވެ.
"ރޫދްރަ" އަކީ އިދްރީސް އެލްބާ އަދި ރޫތު ވިލްސަން ލީޑް ރޯލުން ފެނިގެން ދިޔަ ބީބީސީގެ ސީރީޒް "ލޫތާ" ގެ އިންޑިއަން އެޑެޕްޓޭޝަން އެކެވެ. އެ ސީރީޒްގައި އަޖޭ ކުޅޭނީ ޓައިޓަލް ރޯލެވެ. މިއީ ބީބީސީ ސްޓޫޑިއޯ އާއި އެޕްލޯޒް އެންޓަޓެއިންމެންޓުން އުފައްދާ ސީރީޒް އެކެވެ.
"ރޫދްރަ" އިން ޑިޖިޓަލް ދުނިޔެއަށް އަޖޭ ތައާރަފުވާއިރު ހިންދީ ޑިޖިޓަލް މަސައްކަތެއް، ރާޝީ ކުރާނެ މިއީ ދެވަނަ ފަހަރެވެ. ރާޝީ މީގެ ކުރިން ވަނީ ޑީކޭގެ ކުރިއަށް އޮތް ފިލްމަށްވެސް ސޮއި ކޮށްފަ އެވެ. ރާޝީ ލީޑްރޯލުން ފެންނާނެ އެ ފިލްމުގައި މުހިންމު ރޯލުތަކުން ޝާހިދު ކަޕޫރު އަދި ވިޖޭ ސޭތުޕަތީ ވެސް ފެންނާނެ އެވެ.
ރިޕޯޓުތައް ބުނާ ގޮތުން ސީރީޒްގެ މަސައްކަތް ފަށާނީ އަންނަ ޖުލައި މަހުގެ 21 ވަނަ ދުވަހު އެވެ. މަންޒަރުތައް ނަގަން ހަމަޖެހިފައިވަނީ މުމްބާއީގެ އެކި ހިސާބުތަކުގަ އެވެ.
ކްރައިމް ޑްރާމާ ގިންތީގެ ސީރީޒް "ރޫދްރަ" ގައި އަޖޭ އަދާކުރާނީ ފުލުހެއްގެ ރޯލެވެ. ރާޝީ ކުޅޭނީ މީހުން މަރާ، ސިކުނޑި ހަމަނުޖެހޭ މީހެއްގެ ރޯލެވެ.
އަންނަ މަހު ފަށާ މި ސީރީޒްގެ ފުރަތަމަ ސީޒަން ދެ މަސްދުވަހުގެ ތެރޭގައި ޝޫޓުކޮށް ނިންމާލަން ތާވަލުކޮށްފައިވާއިރު މި އަހަރު ނިމުމުގެ ކުރިން ހޮޓްސްޓާގައި ސްޓްރީމް ކުރަން ފަށާނެ ކަމަށް ރިޕޯޓުތައް ބުނެ އެވެ.
+1
+1
+1
+1
+1
+1
