ބޮލީވުޑް އެކްޓަރު ވަރުން ދަވަން ލީޑް ރޯލުން ފެންނަ "ބޭޑިޔާ" ގެ ފަހު ޝޫޓިން މިމަހު 26 ގައި ފަށަން ތާވަލުކޮށްފި އެވެ.
މި ފިލްމުގެ ޝޫޓިންތައް ކުރިއަށް ގެންގޮސް ގާތްގަނޑަކަށް 90 އިންސައްތަ މަސައްކަތް ނިމިފައި ވަނިކޮށް މެދުކަނޑައިލަން ޖެހުނީ އިންޑިއާގެ މަހަރާޝްތްރަގައި ކޮވިޑް-19 ގެ ހާލަތު ގޯސްވެ، ލޮކްޑައުން ކުރުމާއި ގުޅިގެންނެވެ. މިދިޔަ އޭޕްރީލް މަހުގެ 19 ގައި ޝޫޓިންތައް މެދުކަނޑައިލިއިރު ފަރުބަދަތަކާއި ޖަންގަލިތަކުގައި ނަގަންޖެހޭ މަންޒަރުތައް ވަނީ މުޅިން ނިންމާލައިފަ އެވެ.
މިމަހު 26 ގައި ޝޫޓިންތައް އަލުން ފަށަން ތާވަލުކުރީ މަހަރާޝްތްރަގައި ކޮވިޑުގެ ހާލަތު ރަނގަޅުވެ ފިޔަވަޅުތަކަށް ލުއި ދޭން ސަރުކާރުން ނިންމުމާއި ގުޅިގެންނެވެ. ނުނިމި ހުރި މަންޒަރުތައް ނަގަން ހަމަޖެހިފައިވަނީ މުމްބާއީގެ އެހި މަންޒިލް ތަކުގަ އެވެ.
"ބޭޑިޔާ" ގައި ވަރުންއާއެކު ބަތަލާގެ ރޯލުން ފެންނާނީ ކްރިތީ ސެނަން އެވެ. މީގެ އިތުރުން އަބީޝެކް ބެނާޖީވެސް މުހިންމު ރޯލަކުން ފެންނާނެ އެވެ. މި ފިލްމު ޑައިރެކްޓު ކުރަނީ އަމަރް ކައުޝިކް އެވެ. ފިލްމު ރިލީޒް ކުރަން ތާވަލުކޮށްފައިވަނީ އަންނަ އަހަރުގެ އޭޕްރީލް މަހުގެ 14 ވަނަ ދުވަހު އެވެ.
ކޮވިޑުގެ ސަބަބުން ބޮލީވުޑްގެ ގިނަ މަސައްކަތްތަކެއް ވަނީ ހުއްޓިފަ އެވެ. އެހެންނަމަވެސް ހާލަތު ރަނގަޅުވަމުން ދިޔުމާއިއެކު އެ ފިލްމުތަކުގެ މަސައްކަތް އަލުން ފަށަން މިހާރު ދަނީ ތައްޔާރުވަމުންނެވެ.
+1
+1
+1
+1
+1
+1
