މާލޭގެ ބަނދަރުމަތީގައި ހުއްޓިލައިގެން ހުރެވުނީ ހަލަބޮލި މާހައުލަށް ބަލަހައްޓައިގެންނެވެ. ފުޑް ކޯޓުގެ ކޮންމެ ރެސްޓޯރެންޓެއްވެސް އޮތީ ފުރިފަ އެވެ. އާއިލާތައް ކެއުމުގަ އެވެ. ރަހުމަތްތެރިންނާއެކު ކޮފީގަ އެވެ. އަނގަ މަޖާ ނެގުމާއި ބާރު ހިނިގަނޑުތަކުން ތަނަށް އޮތީ ދިރުން ވެރިވެފަ އެވެ. އޭގެ އަނެއް ފަރާތުން މަގުމަތީގައި ސައިކަލުތަކާއި ކާރުތައް ދުއްވަނީ އެވެ. ކާރޫބާރޫ އެހާ ބޮޑެވެ.
އަހަރެން މާލެ އައީ އުމުރުން އެންމެ 8 އަހަރުގަ އެވެ. ގްރޭޑު އެކެއް ރަށުން ކިޔެވުމަށްފަހު މަންމައާއި ބައްޕަ ނިންމީ އަހަރެން މާލެ ބަދަލު ކުރާށެވެ. އޭރު ދޮންތަ އޯލެވެލް ފުރިހަމަ ކޮށްފި އެވެ. ރަށުން އޭލެވެލްއަށް ކިޔެވެން އޮތް ނަމަވެސް އެއް އަހަރު މަޑުކުރުމަށްފަހު މަންމަ އާއި ބައްޕަ މާލެ ބަދަލުވާން ނިންމީ ދޮންތަ ލޯޔަރަކަށް ހެދުމަށް މަތީ ތައުލީމު އުނގަންނައިދޭށެވެ. އެއް އަހަރު މަޑުކުރަން ޖެހުނީ އޭރު އެވަރުގެ ތަނަވަސްކަމެއް ނެތީމަ އެވެ.
ތަގުދީރުގެ ނިޔާ ނިކަން ދެކޭށެވެ. 17 އަހަރު ފަހުން މިއަދު ދޮންތައަކީ ތިން ކުދިންގެ މަންމަ އެކެވެ. މާލެ ބަދަލުވެ ކޯސް ނުލިބި އުޅެނިކޮށް ދޮންތަ މީހަކާ އިންނަން ނިންމީ އެވެ. ނިހާދުބެ އަކީ ރަނގަޅު ފިރިއެކެވެ. ތިން ކުދިންނަށް ރަނގަޅު ބައްޕައެއްވެސް މެއެވެ. އަހަރުމެން އެންމެން އުޅެނީ އެއްކޮށެވެ. ނިހާދުބެއާއި ބައްޕަގެ މިންނެތް މަސައްކަތުން އަހަރުމެން ދިރިއުޅެނީ ހުޅުމާލޭ ޕްލެޓިނަލް ރެޒިޑެންސްގެ ފަސް ކޮޓަރީގެ އެޕާޓްމެންޓެއްގަ އެވެ. އެޕާޓްމެންޓު ގަތީ މީގެ 3 އަހަރު ކުރިންނެވެ. ބައްޕަ އަކީ އިންޖިނިއަރެކެވެ. ނިހާދުބެއަކީ އަމިއްލަ ރެސްޓޯރެންޓަކާއި ފިހާރައެއް ހިންގާ ވިޔަފާރިވެރި އެކެވެ.
މިއަދު އަހަރެންނަކީ ލޯޔަރެކެވެ. އުސްތާޒެކެވެ. މަންމައާއި ބައްޕަ، ދޮންތައަށްޓަކައި ދެކުނު ހުވަފެން ހަގީގަތަކަށް ހަދައިދިނީ އަހަރެންނެވެ. އުމުރުން އެންމެ 25 އަހަރުގައި އަހަރެންގެ ނަމުގެ ކުރިއަށް އުސްތާޒު ކިޔުމަކީ އަހަންނަށްވުރެއް ބޮޑަށް މަންމަމެން ފަހުރުވެރިވާ ކަމެކެވެ. ފުރަތަމަ ކިޔަވަން ފެށިއިރު މާ ބޮޑު ޝައުގުވެރިކަމެއް ނެތަސް ކިޔެވުން ނިމުނުއިރު މިކަމަށް ޝައުގުވެރިކަން އުފެދިއްޖެ އެވެ. ކިޔެވުން ނިމުނުތާ އަދި މިވީ ގާތްގަނޑަކަށް މަސް ދުވަހެވެ. އެހެންވެ އަދި ވަޒީފާއަކަށް ނުދަމެވެ. ހަގީގަތަށް ބުނާނަމަ ވަކި ތަނަކަށް ނޫނީ ވަޒީފާއަށް ދާން ބޭނުން ނުވަނީ އެވެ. އަހަރެން އެންމެ ކުރީއްސުރެއްވެސް ވަޒީފާއަށް ދާން ބޭނުންވަނީ ރައީސް އޮފީހަށެވެ. އެހެންވެ އެތަނުން ވަޒީފާއަކަށް އިއުލާން ކުރަންދެން މަޑުކުރާނީ އެވެ.
ސިއްސައިގެން ދިޔައީ ދޯންޏަށް އަރަން އަންނާށޭ ބުނެ މީހާކު ހަޅޭއްލަވައިގަތުމުންނެވެ. ތިރީގައި ބަހައްޓާފައި ހުރި ދަބަސް ނަގައި ކޮނޑުގައި އަޅުވައިލި ނަމަވެސް ކުރިއަށް ހިނގައި ނުގަނެ މަޑުކުރީމެވެ. އެންމެން އަރައި ނިމެންދެންނެވެ. އަހަރެންނަކީ އަބަދުވެސް މީހުން މާގިނަ ތަންތަނަށް ދާން ވަރަށް ޖެހިލުންވާ މީހެކެވެ. ކޮފީތަކަށް ދިޔުމާ، ސައިކަލު ބުރުޖަހަން ދިޔުމަކީ އެއްވެސް އިރެއްގައި އަހަރެންގެ މިޒާޖެއް ނޫނެވެ. އަހަރެންގެ މާގިނަ ރައްޓެހިން ނެތީވެސް އެހެންވެގެން ކަމަށް ވެދާނެ އެވެ.
މީހުން މަދުވުމުން އަހަރެން ކުރިއަށް ހިނގައިގަތީމެވެ. ދޯންޏަށް އަރާށެވެ. މާ ބޯ ނޫން ދިގު ފިލައިގަނޑެއް ފާލަމާ ދޯންޏާ ދޭތެރޭ އޮތެވެ. އޭގެ މަތިން ހިނގާފައި ގޮސް ދޯންޏަށް އެރީމެވެ. އެރުމާއެކު ދިމާވީ ބައްޕަގެ ރައްޓެއްސަކާ އެވެ. އަރުހަމްހެއްޔޭ ބުނެ ސަލާން ކޮށްލި އެވެ. އަދި އަހަރެންގެ ޖާގަ ދައްކަން ދޯނި ތެރެއަށް ވަނެވެ. މީހުން ވަރަށް ގިނަ އެވެ. އެކަމަކު އަހަރެންގެ ޖާގަ އިނީ ކަނެއްގައިކަމުން މާ ބޮޑު ހާސްކަމެއް ނެތެވެ. އަޅާފައި އޮތް ކުނަލުގެ މަތީގައި އިށީންދެ ދަބަސް ކޮނޑުން ނެއްޓީމެވެ. އަދި އެއާބަޑް ނަގަން ދަބަސް ހުޅުވައިލީމެވެ.
މާގިނަ އިރެއް ނުވެ ދޯނި ނައްޓާލައިފި އެވެ. މިއީ 8 ގަޑިއިރުގެ ދިގު ދަތުރެވެ. ދަތުރު ކުރަނީ ޅ. ކުރެންދޫއަށެވެ. އަހަރެންގެ އަމިއްލަ ރަށަށެވެ. މިއީ އަހަރެން މާލެ ބަދަލުވުމަށްފަހު ރަށަށް ދާ ފުރަތަމަ ފަހަރެވެ. 25 އަހަރު ވެގެން ދިޔައިރު އެންމެ ފަހަރަކުވެސް ރަށަކަށް ނުދަމެވެ. މަންމަމެން ދެތިން ފަހަރަކު ރަށަށް ދިޔަ އެވެ. ކޮންމެ ފަހަރަކުވެސް އަހަރެން މަޑުކުރަނީ ބޮޑު ބޭބެ ކައިރީގަ އެވެ. ހަމަ ރަށަށް ދާހިތް ނުވެގެންނެވެ. މިފަހަރުވެސް ދާން ނިންމީ އަހަރެން އެންމެ ކުޑައިރުއްސުރެއް އަބަދުވެސް ހުރިހާ ވާހަކެއް ހިއްސާ ކުރާ ރަހުމަތްތެރިޔާގެ ކައިވެނި ހަފްލާއަށެވެ. އަހަރެން ހަނދާން ހުންނަން ފެށީއްސުރެއް ސަމީރުއާ ގުޅުން އޮވެ އެވެ. ރަށުގައި ދެމީހުން އެއްކޮށް އުޅުމަށްފަހު އަހަރެން މާލެ ބަދަލުވިތާ ދެ އަހަރުވެސް ނުވެ ސަމީރުވެސް މާލެ ބަދަލުވެއްޖެ އެވެ. މާލޭގައިވެސް އަހަރެންގެ އެންމެ ގާތް ރަހުމަތްތެރިއަކީ ސަމީރެވެ. ރަށު ކުއްޖަކާ ކައިވެނިކުރަން ނިންމައި ސަމީރު އެންމެ ފުރަތަމަވެސް ދައުވަތު ދިނީ އަހަރެންނަށެވެ. އެހެންވެ ކަމުގެ މުހިންމު ކަމުން ދާން ޖެހުނީ އެވެ.
އަހަރެންގެ ދިރިއުޅުމަކީ ވަރަށް އުފާވެރި ހަމަޖެހޭ ދިރިއުޅުމެކެވެ. އަހަރެންނަށް އަހަރެންގެ ދިރިއުޅުން ވަރަށް ފުރިހަމަ އެވެ. އެކަމަކު މަންމައާއި ބައްޕައަށް އަދި ސަމީރަށްވެސް އަހަރެންގެ ނަފްސާނީ މައްސަލައެއް ނޫޅޭ ކަމާމެދު އަބަދުވެސް ޝައްކު ކުރެ އެވެ. މަންމަމެން ބޭނުންވެގެން ދެތިން ފަހަރަކު ނަފްސާނީ ޑޮކްޓަރަކަށްވެސް ދެއްކީމެވެ. މީހުންނާ އަހަރެން ވާހަކަ ނުދައްކާތީ އެވެ. ނުގުޅޭތީ އެވެ. މިއަދާ ހަމައަށް އައިއިރުވެސް ލޯބީގެ ގޮތުން އަހަރެން ދުވަހަކުވެސް ކުއްޖަކާ ވާހަކައެއް ނުދައްކަމެވެ. އެކަހަލަ ގުޅުމެއްވެސް ނުހިންގަމެވެ. މަންމަމެން ކަންބޮޑުވަނީވެސް އެކަމާ އެވެ.
ހަގީގަތަށް ބުނާނަމަ ޝައުގުވެރިކަން ނުހުންނަނީއެއް ނޫނެވެ. މީގެ 3 އަހަރު ކުރިން އަހަރެން ނުހާއާ ވާހަކަ ދެއްކީމެވެ. ނުހާއަށް ކަމު ނުދިޔައީ އަހަރެން ވަގުތު ނުދޭތީ އެވެ. އެކަމަކު އަހަރެންނަށް ކިޔެވުމަށްވުރެއް މިހުންމު ކަމެއް އޭރު ނެތީ އެވެ. އަހަރެންނަކީ ސައިކަލެއް ހުއްޓަސް އަންހެން ކުދިން ގޮވައިގެން ދުއްވަން ދިޔުމާއި އަގުބޮޑެތި ރެސްޓޯރެންޓުތަކަށް ދާ ހިތްވާ މީހެއް ނޫނެވެ. ފަހަރުގައި އަހަރެން މާ އޯލްޑް ސްކޫލް އީއެވެ. އެކަމަކު އަހަރެންގެ އުސޫލުތައް ބަދަލުކުރާކަށް ޒަމީރު ތަނެއްވެސް ނުދެ އެވެ.
އިސާހިތަކު ދޯނީގައި ތިބި އެންމެންގެ އަޑު ކެނޑި ހަމަހިމޭންކަން ވެރިވި އެވެ. އަހަރެން ހެޑްސެޓު ނެއްޓާލައި ހަމަޖެހިލީ ދެނެވެ. ދޯނީގެ ގެގަނޑުން ބޭރަށް ނިކުމެލަން ބޭނުންވެއްޖެ އެވެ. މަޑުމަޑުން ތެދުވެ ފައިވާނަށް އަރައި ދޯނީގެ ކުރިކޮޅަށް ނިކުމެ ތިރީގައި އިށީންދެލީމެވެ. އެއްވެސް މީހަކު ނެތެވެ. އެހެންވެ އަހަރެންނަށް އެ ހަމަހިމޭންކަން ވަރަށް ކަމުދިޔަ އެވެ. ވަށައިގެން ވަނީ އަނދިރިކަމެވެ. އެ އަނދިރިކަމުގެ ތެރޭގައި އުޑުމަތީގައިވާ ތަރިތައް ވަރަށް ސާފުކޮށް ފެނެ އެވެ. ހަނދު ފެންނާކަށް ނެތެވެ. އެކަމަކު އުޑުމަތީގައި އޭގެ ފަޅުކަމެއް ނެތެވެ.
އަމިއްލަ ދުނިޔެއަށް ގެއްލިފައި އިންދާ ފަހަތުން މީހެއްގެ ހިލަމެއް ވިހެން ހީވެގެން ފަހަތަށް އެނބުރިލީމެވެ. ފުރަތަމަވެސް އަހަރެންގެ ލޮލުގައި އަޅައިގަތީ އޮމާން ފުރިހަމަ ފައިތިލަ އެވެ. މަޑުމަޑުން މައްޗަށް ބަލައިލީމެވެ. ފަހަތުގައި ހުއްޓިގެން ހުރީ ރޫފަ ރީތި އަންހެން ކުއްޖެކެވެ. އަހަރެންނަށް ބޭ އިހްތިޔާރުގައި ހީލެވުނެވެ. މަޑުމަޑުން ކުރިއަށް މޫނު އަނބުރައިލީ އެ ޒުވާނާގެ ރީތި މޫނުގައި އަޅައިގަތްކަން ނުދެއްކުމަށެވެ.
"މިތާ އިށީންދެލިޔަސް އެންމެ ރަނގަޅުތަ" އޭނާ ވާހަކަ ދެއްކީ އަހަރެންނާ އެވެ.
އާނއެކޭ ބުނުމުގެ ގޮތުން އަހަރެން ބޮލުން އިޝާރާތް ކޮށްލީމެވެ.
"ކީއްވެ އެކަނި ތިއިނީ. މަށަށް އުޅެ އުޅެ ނުނިދުނު" އޭނާ އިށީންނަމުން އަހަރެންނާ ވާހަކަ ދެއްކި އެވެ. ރާގުން އެއީ ވަރަށް ހިތް ހެޔޮ ކުއްޖެއްކަން އެނގުނެވެ. އޭނާ އިށީނީވެސް މާ ދުރުނޫން ހިސާބެއްގަ އެވެ.
"ކަމެއް ނުވެ. މި ހަމަ ނިކުމެލީ" އަހަރެން ޖަވާބު ދިނީ ވަރަށް ކުރުކޮށެވެ.
އެޒުވާނާގެ ހަރަކާތްތައް ވަރަށް ފަރި އެވެ. ލައިގެން އިން މަޑު ރަތް ކުލައިގެ ހެދުން ވަޔާ ވިހުރިލަމުން ދިޔައިރު އެ ހަށިގަނޑުން ރީތި މިޔުޒިކެއް ކުޅެމުން ދިޔަ ފަދަ އެވެ.
"ކުރިން ދުވަހަކުވެސް ރަށަކުން ނުފެނޭ. އަލަށްތަ ތިދަނީ" އޭނާ ވާހަކަ ދެއްކި އެވެ.
"އާނ. ވަރަށް ކުޑައިރު މާލެ ބަދަލުވީ އޭގެ ފަހުން އަލަށް މި ދަނީ." އިތުރަށް ވާހަކަ ދައްކަން އަހަރެންވެސް ބޭނުންވި އެވެ.
"އަދި ނަމެއްވެސް ނުބުނެވޭ ދޯ. އަހަރެންނަށް ކިޔަނީ ޝުހާ" ސަލާން ކޮށްލަން އޭނާ އަތް ދިއްކޮށްލި އެވެ.
"އަރުހަމް" ސަލާން ކޮށްލަމުން އަހަރެން ޖަވާބު ދިނީމެވެ.
އަހަރެންނަކީ ކުދިންނާ މާ ގިނަ ވާހަކަ ދައްކާ ހިތްވާ މީހެއް ނޫނެވެ. ވީހާވެސް ކުރުކޮށް ބުނަން އުޅޭ އެއްޗެއް ބުނުމަށްފަހު އަބަދުވެސް ވާހަކަ ކުރުކޮށްލެވޭތޯ ބަލަމެވެ. އެކަމަކު ޝުހާއާ ވާހަކަ ދައްކަން ބޭނުންވި އެވެ. ކީއްވެކަމެއް ނޭނގެ އެވެ. އެކަމަކު އިތުރަށް އެ އަޑު އަހަން ބޭނުންވި އެވެ.
"ޝުހާ ކީއްކުރަން މާލެ އައީ" އަހަރެން ސުވާލު ކޮށްލީމެވެ.
"ހަމަ ދެން ޖައްސާލި. ފެމިލީ އެއްބައި އޮންނާނެ މާލޭގަ. ވަރަށް ބޮޑު އަހަރުން އާއިލާ." ހިނިތުންވެލަމުން ޝުހާ ވާހަކަ ދެއްކި އެވެ. އަހަރެންނާ އިތުރު ސުވާލެއް ނުކުރިނަމަވެސް ޝުހާގެ ވާހަކައިން އޭނާވެސް އިތުރު ވާހަކަ ދައްކަން ބޭނުންވާ ކަމުގެ އިހުސާސް އަހަރެންނަށް ކުރެވުނެވެ.
"އަހަރެން އަސްލު ވަރަށް ތަންތަނަށް ދާހިތް ނުވޭ. މާލެ އައިފަހުން ރާއްޖެއިން ބޭރަށް ދެތިން ފަހަރަކު ދިޔައިން. ރަށަކަށް ނުދަން ދުވަހަކުވެސް" އަހަރެން އިތުރަށް ވާހަކަ ކުރިއަށް ގެންދިޔައީމެވެ.
"ދުވަހަކުވެސް ނުދަން؟ އެއްވެސް ރަށަކަށް؟" ނުހާ ޖަވާބު ދިނީ ހައިރާން ވާ ކަހަލަ ގޮތަކަށެވެ.
"އާނ. ހަމަ އެއްވެސް ރަށަކަށް ނުދަން. އުހުން. ހުޅުމާލެ ދިޔައިން." އަހަރެންގެ ޖޯކު އެހާ މަޖާ ނޫންކަން އެނގުނީ ބުނެވުނު ފަހުންނެވެ. އެކަމަކު ޝުހާ ހީލި އެވެ. އަހަރެންނަށް ޝުހާގެ އެ އިޝާރާތައް ގަޔާ ވެވުނެވެ.
އަހަރެން ވާހަކަ ދައްކަމުން ދިޔައީމެވެ. އަހަރެންގެ އެތައް ވާހަކައެއް ހިއްސާ ކުރީމެވެ. ޝުހާގެ އެތައް ވާހަކައެއް އަހަރެންނާވެސް ހިއްސާ ކުރި އެވެ. ދެމީހުން އެންމެ ކާހިތްވާ އެއްޗެއްސާ އެންމެ ދާހިތްވާ ތަނުން ފެށިގެން އެންމެ ދެރަވި ދުވަހަށް ދާންދެން ކިޔައިދިނީމެވެ. އަހަރެންގެ ހުރިހާ ވާހަކައެއް ޝުހާ އަޑުއަހަމުން ދިޔައީ ވަރަށް ޝައުގުވެރިކަމާއެކު އެވެ. އެގަޑިއިރު ދެގަޑިއިރަށް ވެގެން ދިޔަކަންވެސް ނޭނގުނެވެ. ވަގުތުތައް ފާއިތުވަމުން ގޮސް ދަންވަރު 3 ޖަހައިފި އެވެ. ވާހަކަ ހުސްވެއްޖެ އެވެ. އަނެއްކޮޅުން ނިދިވެސް އައީއެވެ. ދެމީހުންވެސް ހިމޭން ވެލީމެވެ. ޝުހާގެ ނަމްބަރު ދޭށޭ ބުނަން ވަރަށް ބޭނުންވި އެވެ. އަހަރެންގެ ހިތް ޝުހާއަށް ލެނބިއްޖެއޭ ބުނަންވެސް ބޭނުންވި އެވެ. އެކަމަކު އެއްމެ ދެތިން ގަޑިއިރުން ހިތް ދެވޭނީ ކާކަށް ހެއްޔެވެ. ބުންޏަސް އެވާހަކަ ގަބޫލު ކުރާނީ ކާކު ހެއްޔެވެ. އެންމެ ރަނގަޅު ގޮތަކީ އަދި އެއްވެސް ވާހަކައެއް ނުބުނުމެވެ. ދެމީހުންވެސް މިދަނީ އެއް ތަނަކަށެވެ. އެހެންވެ ރަށުން ދިމާކުރާނީއޭ ހިތާ ކޮމާ އެއް ޖަހާފައި ކުރުކޮށްލީމެވެ. އިސާހިތަކު އަހަރެންނަށް ލޯމެރިއްޖެ އެވެ. ނިދުނީ ކޮން އިރަކު ކަމެއްވެސް ނޭނގުނެވެ.
އަހަރެންނަށް ހޭލެވުނީ ފަތިހު ފަހެއް ޖަހަނިކޮށެވެ. އޭރު ރަށުގެ މަލަމަތި ފެންނަން ފަށައިފި އެވެ. އަހަރެންނަށް ހޭލެވުނުއިރު ކައިރީގައި ޝުހާއެއް ނެތެވެ. ވަށައިގެން ބަލައިލިއިރު އިތުރު މީހަކު ނެތެވެ. މަޑުމަޑުން ތެދުވެ ގެގަޑު ތެރެއަށް ވަނީމެވެ. މީހުންތައް ހޭލައިގެން ދޯނިން ފައިބަން ތައްޔާރު ވަނީ އެވެ. އެތެރެއަށް ވަދެ އަހަރެންވެސް ދަބަސް ތައްޔާރުކޮށްލީމެވެ. އެއާއެކު މުޅި ދޯނިތެރެ ހޯދައިލެވުނީ އެންމެ މޫނެއް ފެނޭތޯ އެވެ. އެކަމަކު އެމޫނެއް ނުފެނުނެވެ.
ދޯނި ބަނދަރަށް ކައިރިކުރުމާއިއެކު އެންމެ ފުރަތަމަ އަހަރެން ފައިބަން ބޭނުންވި އެވެ. އެއީ ޝުހާ ދޯނިން ފައިބާގެ ވަގުތަކަށް އިންތިޒާރު ކުރުމަށެވެ. އެހެންވެ އަވަސް އަވަހަށް ކޮނޑުގައި ދަބަސް އަޅުވައިގެން ފައިބަން ދިޔައީމެވެ. ދޯނިން އެންމެ ފުރަތަމަ ފޭބި ދެތިން މީހުންގެ ތެރޭގައި އަހަރެން ހިމެނޭނެ އެވެ. އެއާއެކު ދޯންޏާއި ދިމާއަށް ކުރިމަތިލައިގެން ހުރެވުނީ ޝުހާ ފެންނާނެ ކަމުގެ އިންތިޒާރުގަ އެވެ. މީހަކަށްފަހު މީހަކު ފައިބަމުން ދިޔަ އެވެ. އަދިވެސް ޝުހާގެ ހިލަމެއް ނުވެ އެވެ.
އެހެން ހުއްޓާ ފަހަތުން އައިސް ކޮނޑުގައި ޖަހައިލީ ސަމީރު އެވެ. އަހަރެން އެނބުރެލީމެވެ.
"ކޯއްޗެއް ތި ހޯދަނީ؟ ފޮށިތަ؟" ސަމީރު ވާހަކަ ދެއްކި އެވެ.
"ނޫނޭ. ފޮއްޓެއް ނޫން. ދަބަސް އެކަންޏޭ ގެނައީ" އަހަރެން ޖަވާބު ދިނީމެވެ. އެކަމަކު އަދިވެސް ސަމާލުކަން ހުރީ ދޯނިން ފައިބަމުންދިޔަ މީހުންނަށެވެ.
"އޭ. ދެން ހިނގާ ދާން." ސަމީރު ވާހަކަ ދެއްކި އެވެ.
އަހަރެން ރަށުތެރެއަށް ބަލައިލީ ދެނެވެ. ކުޑައިރުގެ ހަނދާންތައް އާވީ ދެނެވެ. އެ ހިތްގައިމު މަންޒަރު، ހިތްފަސޭހަ ދިރިއުޅުން ވަޒަން ކުރެވުނީ ދެނެވެ. ސަމީރުއާއެކު ކުރިއަށް ހިނގައިގަތީމެވެ. އެއާއެކު ތަންކޮޅެއް ދުރުން އަޅައިގަތީ ޝުހާގެ މޫނެވެ. ސަމީރު ހިނގާފައި ދިޔައީ ޝުހާ ހުއްޓިލައިގެން ހުރި ދިމާއަށެވެ. ޝުހާ އާއެކު އެހެން ކުއްޖަކުވެސް ހުއްޓެވެ. އަހަރެންވެސް ހިނިތުންވުމާއެކު އެދިމާއަށް ދިޔައީމެވެ.
"ޝުހާ" އަހަރެން ގޮވައިލީމެވެ. ޝުހާ އަހަރެންނާ ސަލާން ކޮށްލަން އަތް ދިއްކޮށްލި އެވެ. އެކަމަކު މޫނުގައި ހުރީ ހައިރާން ކަމެވެ.
"އޭ ކައެއަށް ކިހިނެއް ޝުހާ އެނގެނީ؟" ސަމީރު ސުވާލު ކުރި އެވެ.
"އެ ތެދެއް. ސަމީރު ބުނި ގައިމު ދުވަހަކުވެސް ފޮޓޯއެއްވެސް ނުދައްކަމޭ. އަހަރެން މީ އެއްވެސް ސޯޝަލް މީޑިއާއެއްގަވެސް އުޅޭ މީހެއް ނޫން" ޝުހާ ވާހަކަ ދެއްކި ގޮތުން އަހަރެންނަށް ހައިރާންކަން ލިބުނެވެ.
"ކައެ ގަދަ އިނގޭ. އެންމެ ރަނގަޅޭ ދެން. މީ ޝުހާ. މަގޭ ވާން އުޅޭ އަނބި ގޮއްޔެ" ސަމީރުގެ އެ ޖުމްލައިން އަހަރެންނަށް ސިހުމެއް ލިބުނެވެ. އެތައް ސުވާލެއް އުފެދުނެވެ. ރޭގަ އަހަރެންނާ ދިމާވީ ހަމަ ޝުހާ އެވެ. އެކަމަކު އެހެން ވާންވީވެސް ކީއްވެ ހެއްޔެވެ. ސަމީރު ބުނާ ގޮތުންނަމަ، ސަމީރުގެ ޝުހާއަކީ ދުވަހަކު މާލެ ދިޔަވެސް ކުއްޖެއް ނޫނެވެ. ދެން ޝުހާއާ ވައްތަރު އެހެން މީހަކު ދޯނީގައި ހުރީ ހެއްޔެވެ؟ ނޫނެކެވެ. ޝުހާ ލައިގެން އެހެރީ ރޭގައިވެސް ލައިގެން ހުރި ހެދުމެވެ. އެހެން ވާންވީ ގޮތެއް އަހަރެންނަކަށް ނުވިސްނުނެވެ.
ސަމީރުއާ ޝުހާއާ އެކު އަހަރެން ހިނގައިގަތީ ގެއާ ދިމާއަށެވެ. ދިޔަ މަގުމަތީގައި އެތައް ފަހަރަކު ޝުހާގެ މޫނަށް ބެލުނެވެ. ޔަގީން ކޮށްލުމަށެވެ. ރޭގައި އަހަރެންނަށް ފެނުނީ ހުވަފެނެއް ހެއްޔެވެ؟ އެހެންވިޔަސް ދުވަހަކުވެސް އަހަރެންނަށް ނުފެންނަ މޫނެއް ފެނުނީ ކީއްވެ ހެއްޔެވެ؟
- ނިމުނީ -
