ދުވަސްތަކަކަށްފަހު އެއް ދުވަހެއްގެ ތެރޭ 5000 އަށްވުރެ ގިނަ ފަތުރުވެރިން މިއަދު އަންނަން ހަމަޖެހިފައިވާ ކަމަށް ޓުއަރިޒަމް މިނިސްޓަރ ވިދާޅުވެއްޖެއެވެ.
ޓުއަރިޒަމް މިނިސްޓަރ ކުރެއްވި ޓުވީޓެއްގައި ވިދާޅުވީ، މިއަދު 5516 ފަތުރުވެރިން ރާއްޖެއައުމަށް ހަމަޖެހިފައިވާ ކަމަށެވެ. އަދި މިއީ މާރޗް 26ގެ ފަހުން އެއްދުވަހާއި މިހާ ގިނައިން ފަތުރުވެރިން ރާއްޖެ އައުމަށް ހަމަޖެހިފައިވާ ދުވަހެއް ކަމަށާއި މިއީ ފަތުރުވެރިކަމުގެ ސިނާއަތުގައި މަސައްކަތްކުރާ ކުރާ ފަރާތްތަކާއި ކަމާ ގުޅޭ މުއައްސަސާ ތަކުން ކެނޑިނޭޅި ކުރަމުންދާ މަސައްކަތުގެ ނަތީޖާ ކަމަށް ޓުއަރިޒަމް މިނިސްޓަރ ވިދާޅުވިއެވެ.
ނިމުނު ޖުލައި މަހު އެވްރެޖް ގޮތެއްގައި ދުވާލަކު ވަނީ 3000 އަށްވުރެ ގިނަ ފަތުރުވެރިން ރާއްޖެ އައިސްފައެވެ.
ނިމިގެންދިޔަ ޖުލައިމަހުގެ އަދަދުތަކަށް ބަލާލާއިރު، މިމަހުގެ ފުރަތަމަ ތިން ދުވަހުވެސް ރާއްޖެއަށްވަނީ ގިނަ އަދަދަކަށް ފަތުރުވެރިން އައިސްފައެވެ. އެގޮތުން މިމަހުގެ ފުރަތަމަ ދުވަހު ރާއްޖެއަށް 2493 ފަތުރުވެރިން އައިސްފައިވެއެވެ. އަދި މިމަހުގެ 2ވަނަ ދުވަހު 2217 ފަތުރުވެރިން އަދި މިމަހުގެ ތިންވަނަ ދުވަހު ރާއްޖެއަށްވަނީ 3078 ފަތުރުވެރިން ޒިޔާރަތްކޮށްފައެވެ.
ނިމިގެންދިޔަ ޖޫންމަހު ރާއްޖެއަށް އެއް ދުވަހެއްގެތެރޭ އެންމެ ގިނަ އަދަދަކަށް ފަތުރުވެރިން އައިސްފައިވަނީ ޖޫންމަހުގެ 26 ވަނަ ދުވަހުއެވެ. އެދުވަހު ރާއްޖެއަށްވަނީ 2607 ފަތުރުވެރިން އައިސްފައެވެ.
