ފާއިތުވި އޮކްޓޯބަރު މަހު ރާއްޖެއަށް އިމްޕޯޓް ކުރި މުދަލުގެ އަގު 2020 ވަނަ އަހަރުގެ އޮކްޓޯބަރު މަހާ އަޅާ ބަލާއިރު 89 އިންސައްތަ އިތުރުވެފައިވާ ކަމަށް ކަސްޓަމްސް އިން ހާމަކޮށްފިއެވެ.
މޯލްޑިވްސް ކަސްޓަމްސް ސާރވިސްއިން އާއްމުކޮށްފައިވާ ތަފާސް ހިސާބުތަކަށް ބަލާއިރު، އެކްސްޕޯޓް ކުރި މުދަލުގެ އަގު ވަނީ 18 އިންސައްތަ ދަށްވެފައެވެ.
2020 ވަނަ އަހަރުގެ އޮކްޓޯބަރު މަހު ރާއްޖެއަށް 2.0 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ އޮކްޓޯބަރު މަހު މި އަދަދު ވަނީ 3.8 ބިލިއަން ރުފިޔާއަށް އިތުރުވެފައެވެ.
މިއީ ކޮވިޑް19ގެ ބަލިމަޑު ކަމުގެ ސަބަބުން ދިވެހިރާއްޖޭގެ އައި ހީނަރުކަމަށްފަހު 2020 ވަނަ އަހަރުގެ ޖަނަވަރީ މަހުގެ 3.7 ބިލިއަން ރުފިޔާގެ އިމްޕޯޓާއި އަރާ ހަމަކުރި ފުރަތަމަ ފަހަރު ކަމަށް ކަސްޓަމްސް އިން ހާމަކުރެއެވެ.
މީގެ އިތުރުން އޮކްޓޯބަރު މަހު ދައުލަތަށް ލިބުނު އާއްމުދަނީ 2020 ވަނަ އަހަރުގެ އޮކްޓޯބަރު މަހާ އަޅާ ބަލާއިރު 31 އިންސައްތަ ވަނީ ދަށްވެފައެވެ. 2020 ވަނަ އަހަރުގެ އޮކްޓޯބަރު މަހު 424 މިލިއަން ރުފިޔާ ދައުލަތަށް ލިބިފައިވާއިރު މިއަހަރުގެ އޮކްޓޯބަރު މަހު މިއަދަދު ވަނީ 294 މިލިއަން ރުފިޔާ ދަށްވެފައި ކަމަށް ކަސްޓަމްސްގެ ތަފާސް ހިސާބުތަކުން ދައްކައެވެ.
ކަސްޓަމްސްގެ ތަފާސްހިސާބުތައް ދައްކާގޮތުން އޮކްޓޯބަރު މަހު ރާއްޖެއިން އެކްސްޕޯޓްކުރި މުދަލުގެ އަދަދު ވަނީ 18 އިންސައްތަ ދަށްވެފައެވެ.
އޮކްޓޫބަރު މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ އޮމާން، އިންޑިއާ، ޔޫއޭއީ އަދި ޗައިނާއިންނެވެ. އޮމާންއިން 512 މިލިއަން ރުފިޔާގެ މުދާ އެތެރެކޮށްފައި ވާއިރު އިންޑިއާއިން 490 މިލިއަން ރުފިއާގެ މުދާ ވަނީ އެތެރެކޮށްފައެވެ. ޔޫއޭއިން 438 މިލިއަން ރުފިޔާގެ މުދާ އެތެރެކޮށްފައިވާއިރު ޗައިނާއިން ވަނީ 437 މިލިއަން ރުފިޔާގެ މުދާ ރާއްޖެއަށް އެތެރެ ކޮށްފައެވެ.
