ފާއިތުވި ނިވެމްބަރު މަހު ރާއްޖެއަށް އިމްޕޯޓް ކުރި މުދަލުގެ އަގު 2020 ވަނަ އަހަރުގެ ނޮވެމްބަރު މަހާ އަޅާ ބަލާއިރު 94 އިންސައްތަ އިތުރުވެފައިވާ ކަމަށް ކަސްޓަމްސް އިން ހާމަކޮށްފިއެވެ.
2020 ވަނަ އަހަރުގެ ނޮވެމްބަރު މަހު ރާއްޖެއަށް 2.1 ބިލިއަން ރުފިޔާގެ މުދާ އިމްޕޯޓްކޮށްފައިވާއިރު މިއަހަރުގެ ނޮވެމްބަރު މަހު މި އަދަދު ވަނީ 4 ބިލިއަން ރުފިޔާއަށް އިތުރުވެފައެވެ.
މީގެ އިތުރުން ނޮވެމްބަރު މަހު ދައުލަތަށް ލިބުނު އާއްމުދަނީ 2020 ވަނަ އަހަރުގެ ނޮވެމްބަރު މަހާ އަޅާ ބަލާއިރު 17 އިންސައްތަ ވަނީ ދަށްވެފައެވެ. 2020 ވަނަ އަހަރުގެ ނޮވެމްބަރު މަހު 276 މިލިއަން ރުފިޔާ ދައުލަތަށް ލިބިފައިވާއިރު މިއަހަރުގެ ނޮވެމްބަރު މަހު މިއަދަދު ވަނީ 322 މިލިއަން ރުފިޔާ އަށް އިތުރުވެފައިވާ ކަމަށް ކަސްޓަމްސްގެ ތަފާސް ހިސާބުތަކުން ދައްކައެވެ.
ކަސްޓަމްސްގެ ތަފާސްހިސާބުތައް ދައްކާގޮތުން ނޮވެމްބަރު މަހު ރާއްޖެއިން އެކްސްޕޯޓްކުރި މުދަލުގެ އަދަދު ވަނީ 29 އިންސައްތަ އިތުރުވެފައެވެ.
ނޮވެމްބަރު މަހު ރާއްޖެއަށް އެންމެ ގިނަ މުދާ އެތެރެކޮށްފައިވަނީ ޗައިނާ، އޮމާން، ޔޫއޭއީ އަދި އިންޑިއާއިންނެވެ. ޗައިނާއިން 603 މިލިއަން ރުފިޔާގެ މުދާ އެތެރެކޮށްފައި ވާއިރު އޮމާންއިން 529 މިލިއަން ރުފިއާގެ މުދާ ވަނީ އެތެރެކޮށްފައެވެ. ޔޫއޭއިން 463 މިލިއަން ރުފިޔާގެ މުދާ އެތެރެކޮށްފައިވާއިރު އިންޑިއާއިން ވަނީ 460 މިލިއަން ރުފިޔާގެ މުދާ ރާއްޖެއަށް އެތެރެ ކޮށްފައެވެ.
