ކުރީގެ ރައީސް އަބްދުﷲ ޔާމީންގެ ސަރުކާރުން ހުޅުމާލެ ދެވަނަ ފިޔަވަހީގައި ތަރައްގީކުރި ހިޔާ މަޝްރޫއުގެ ފްލެޓުތަކަށް ވަދެވޭވަރު ވާނީ އަންނަ ޖުލައި މަހުގެ ފަހުކޮޅު ކަމަށް ހައުސިންގް މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަސްލަމް ވިދާޅުވީ އަންނަ މަހުގެ 14 ވަނަ ދުވަހުން ފެށިގެން ހިޔާ ފްލެޓުތަކުގެ އެއްބަސްވުންތަކުގައި އެތަންތަން ލިބުނު ފަރާތްތަކާއިއެކު ސޮއި ކުރުމުގެ މަސައްކަތް އެޗްޑީސީން ކުރަމުން ގެންދާނެ ކަމަށެވެ.
ހިޔާ ފްލެޓުތައް ނިންމުމުގައި ލަސްތަކެއް އައިސްގެން އުޅެނީ އެތަނަށް ކަރަންޓު ލުމުގައި ދަތިތަކެއް ކުރިމަތިވެގެން ކަމަށް އަސްލަމް ވިދާޅުވި އެވެ. އެގޮތުން ކުރީގެ ސަރުކާރުން ކަރަންޓުގެ މަސައްކަތް ހަވާލު ކުރީ ޗައިނާގެ ކުންފުންޏަކަށް ކަމަށާއި ބޭނުންވާ ތަކެތި ރާއްޖެއަށް ފޮނުވާފައިވީ ނަމަވެސް މަސައްކަތް ކުރާ ފަރާތްތަކަށް ކޮވިޑް-19 ގެ ސަބަބުން ރާއްޖެ އައުމުގައި ހުރަސްތަކެއް ހުރިކަމަށް މިނިސްޓަރު ވިދާޅުވި އެވެ.
އެހެންނަމަވެސް ފޮނުވާފައިހުރި ތަކެތި ބޭނުންކޮށްގެން ކަރަންޓުގެ މަސައްކަތް ނިންމައިދިނުމަށް ސްޓެލްކޯއިން ތައްޔާރަށް އޮތް ކަމަށާއި އެހެންނަމަވެސް ޗައިނާ ކުންފުނިން ނޫން އެހެން ކުންފުންޏަކުން އެ މަސައްކަތް ކުރިއަށް ގެންގޮސްފިނަމަ ވޮރަންޓީ ގެއްލޭ ކަމަށް އަސްލަމް ވިދާޅުވި އެވެ. އެހެންކަމުން އެކަމުގައި އޮތް ހައްލަކީ ކޮބައިތޯ ބަލައި އެކަންކަން ކުރާނެ ކަމަށް މިނިސްޓަރު ވަނީ ވިދާޅުވެފަ އެވެ.
ފްލެޓުތަކަށް ފައިސާ ދައްކަން ފަށަން ޖެހެނީ ވަންނަތާ ތިން މަސް ފަހުންނެވެ. މިނިސްޓަރު އަސްލަމް ވިދާޅުވީ ޖުލައި މަހުގެ ފަހުކޮޅު ހިޔާ ފްލެޓުތަކަށް ވަދެވޭވަރުކަމަށް ވިދާޅުވިނަމަވެސް ތަޅުދަނޑި ހަވާލުކުރާ ފަހުން ފްލެޓުތަކަށް ނުވަދެވި ލަސްވާނަމަ މީހުންނަށް އެތަނަށް ވަދެވެންދެން އެ ތިން މަސް ގުނަން ނުފަށާނެ ކަމަށެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މާލެ ސިޓީގެ މޭޔަރު ޑރ. މުހައްމަދު މުއިއްޒުގެ އިތުރުން ހުޅުމާލެ ސިޓީގެ ކައުންސިލަރު އިބްރާހިމް ޝުޖާއުއާއި އެޗްޑީސީގެ ސީއީއޯވެސް ބައިވެރިވެވަޑައިގެންނެވި އެވެ. ނޫސްވެރިންނާއި ބައްދަލުވުމުގެ ކުރިން އެފަރާތްތަކުން ވަނީ ފްލެޓުތަކުގެ މަހު ކުލި ކުޑަކުރުމާއި ގުޅޭގޮތުން މަޝްވަރާތަކެއް ކުރިއަށް ގެންގޮސްފަ އެވެ. މަޝްވަރާތަކުގައި މުއިއްޒު ވަނީ ހިޔާ ފްލެޓުތަކުގެ އަގުތައް 5،700 ރުފިޔާއަށް ކުޑަކުރަން އެދިވަޑައިގެންފަ އެވެ. މިހާރު ކަނޑައަޅާފައިވާ އަގަކީ ސޯޝަލް ހައުސިންއެއްގެ މަހު ކުއްޔަށް ބޮޑު އަދަދެއްކަމަށް މުއިއްޒު ވިދާޅުވި އެވެ.
މިކަމާއި ގުޅިގެން މިނިސްޓަރު އަސްލަމް ވިދާޅުވީ ކުރީ ސަރުކާރުން އަދަދުތައް ޖަހާފައި ވަނީ ނުބައިކޮށް ކަމަށެވެ. ސަރުކާރުން ލޯނު އަނބުރާ އެ ނެގި ފަރާތަށް ދައްކަން ޖެހޭއިރު އެކަން ކުރެވޭނީ ކުލީގެ ގޮތުގައި 7،000 ރުފިޔާ ނަގައިގެން ކަމަށް މިނިސްޓަރު ވިދާޅުވި އެވެ.
މިވާހަކަތަކާއި ގުޅިގެން ކައުންސިލް މެމްބަރު ޝުޖާއު ވިދާޅުވީ ސޯޝަލް ހައުސިންގެ މަޝްރޫއެއްގައި ރައްޔިތުންގެ އަތް ފޯރާ ފަށަށް އަގުތައް ތިރިކުރުމަށް ސަރުކާރުންވެސް ލޯނުގެ ބައެއް ދައްކަން މުހިންމު ކަމަށެވެ. ކުރީ ސަރުކާރުންވެސް އެކަން ކުރަން ނިންމީ އެގޮތަށް ކަމަށް ޝުޖާއު ވިދާޅުވި އެވެ. އެހެންނަމަވެސް މި ސަރުކާރުގެ ވާހަކަ ހުރި ގޮތުން އެފްލެޓުތަކާއި ސަރުކާރުން އެއްވެސް ވަރަކަށް އަޅައިނުލާން އުޅޭފަދަ ގޮތަކަށް ދޭހަވާކަމަށް ވިދާޅުވި އެވެ.
ކުރީ ސަރުކާރުން ހިޔާ ފްލެޓުތަކަށް ކަނޑައެޅީ މަހަކު 5،000 ރުފިޔާ ދައްކާ ގޮތަށެވެ. އެއީ ފިނިޝިންގެ މަސައްކަތްވެސް ނިންމުމަށްފަހު ފްލެޓުތައް ހަވާލުކުރާ ގޮތަށެވެ. މިސަރުކާރުން ފްލެޓުތައް ހަވާލުކުރަން ނިންމީ ފިނިޝިންގް މަސައްކަތް ނުނިންމަ އެވެ.
