ހިޔާ ފްލެޓްތަކަށް ދާއިމީކޮށް ކަރަންޓް ދިނުމުގެ މަސައްކަތް ފެށުމާއެކު ފްލެޓަށް ބަދަލުވާ ފަރާތްތައް އިތުރުވާނެތީ ފްލެޓްތަކަށް މުދާ ވެއްދުމުގައި ހުރިހާ ފަރާތްތަކުންވެސް ސަމާލުވުމަށް އެޗްޑީސީން އިލްތިމާސްކޮށްފިއެވެ.
ހައުސިން ޑިވޮލޮޕްމަންޓް ކޯޕަރޭޝަން އެޗްޑީސީން ބުނީ ފްލެޓްތަކަށް ބޭނުންވާ ތަކެތި އުފުލުމަށް ޓަވަރުތަކުގައި ހަރުކޮށްފައިވާ ލިފްޓްތަކުގެ ތެރެއިން 16 އެޕާޓްމަންޓްގެ ޓަވަރެއްގައިވާ 3 ލިފްޓުން 2 ލިފްޓް އަދި 20 އެޕާޓްމަންޓެއްގެ ޓަވަރެއްގައިވާ 4 ލިފްޓުން 3 ލިފްޓް ބޭނުން ކުރެވޭ ގޮތް ހަދާފައިވާ ކަމަށެވެ. މީގެ އިތުރުންވެސް އެޗްޑީސީގެ މުވައްޒަފުން ޓަވަރުތަކުގެ މަސައްކަތްތައް ކުރިއަށްދާ ގޮތް ބަލައި ކަމާ ގުޅޭ އިރުޝާދު ދެމުންދާނެ ކަމަށާއި މި މަސައްކަތަކީ ގިނަބައެއްގެ މަސްލަހަތާއި ގުޅިފައިވާ ކަމަކަށްވާތީ ފަސޭހަކަމާއެކު މިކަން ކުރިއަށް ގެންދެވެން އަންނަނީ ފްލެޓް ލިބިފައިވާ ފަރާތްތަކުގެ އެހީތެރިކަމާއި އެއްބާރުލުން ލިބިގެން ކަމަށެވެ.
އެހެންކަމުން ފްލެޓް ލިބިފައިވާ ފަރާތްތަކުން ފްލެޓަށް މުދާ ވެއްދުމުގައި މިކަންކަމަށް ސަމާލުވުމަށް ވަނީ އެދިފައެވެ. އަދި އިތުރު މައްސަލައެއް ދިމާނުވާނަމަ މާދަމާ އެޗް 15 އަދި އެޗް 16 ވަނަ ޓަވަރަށް ދާއިމީކޮށް ކަރަންޓް ދޫކުރެވޭނެ ކަމަށް ވެސް އެޗްޑީސީން ހާމަކުރެއެވެ.
