ހިޔާ ފްލެޓްތައް ނިންމުމުގައި ފްލެޓްވެރިން އަމަލުކުރާނެ ގޮތުގެ އުސޫލު އެޗްޑީސީން އާއްމުކޮށްފިއެވެ.
ހިޔާ މަޝްރޫއުގެ ދަށުން ހުޅުމާލެ ފޭސް 2 ގައި އިމާރާތްކޮށްފައިވާ 16 ޓަވަރުގައި ހިމެނެނީ 6720 ފްލެޓެވެ. ފްލެޓްތައް ހަވާލު ކުރުމުގެ މަސައްކަތް އެޗްޑީސީން އަންނަނީ ޖުލައި 14 ވަނަ ދުވަހުން ފެށިގެން ކުރަމުންނެވެ. ހިޔާ މަޝްރޫއުގެ ފްލެޓްތަކުގެ އެތެރޭގެ މަސައްކަތްތައް ކުރުމުގެ އުސޫލުގައިވާ ގޮތުން މަސައްކަތް ކުރާ ހުރިހާ މީހުން ތިބެން ވާނީ އެ ކޯޕަރޭޝަނުން ދޫކޮށްފައިވާ ހާއްސަ ފާހެއް އަޅައިގެން ކަމަށާއި އަދި ކޮވިޑުން ރައްކާތެރިވުމަށް އަޅަން ޖެހޭ ފިޔަވަޅުތައް އެޅުމަށްވެސް ބަޔާންކޮށްފައިވެއެވެ.
އުސޫލުގައިވާގޮތުން އެގޮތުން ފުލެޓުތައް ނިންމުމުގެ މަސައްކަތް ކުރުމަށް ތިން މަސްދުވަހުގެ މުއްދަތެއްދީފައެވެ. އަދި މިމުއްދަތުގައި 24 ގަޑިއިރު މަސައްކަތް ކުރުމުގެ ހުއްދަ އެޗްޑީސީން ވަނީ ދީފައެވެ. ނަމަވެސް މި ހުރިހާ ވަގުތެއްގައިވެސް އުޅެން ޖެހޭނީ ޕީޕީއީ ކިޓު އަޅާއިގެން ކަމަށް އެޗްޑީސީން ބުނެފައިވާއިރު ކެމިކަލް ފަދަ އެއްޗެއް ބޭނުން ކުރާނަމަ، ކެމިކަލް ސްޕްލޭޝް ގޮގުލްސް ބޭނުންކޮށް މަސައްކަތުގައި އުޅޭ ވަގުތު އަންގި އާއި ހެލްމެޓު ފަދަ ތަކެތި ގެންގުޅެން ޖެހޭނެ ކަމަށް އުސޫލުގައި ވަނީ ބުނެފަ އެވެ.
އޭގެ އިތުރުން ސޭފްޓީ ބެލްޓު ނުވަތަ ހާނެސް ސޭފްޓީ ބޫޓާއި، ހިއަރިން ޕްރޮޓެކްޝަނާއި، ކެފުމާއި، ގްރައިންޑު ކުރުމާއި، ޗިޕިން ހަދާއިރު ފުލް ފޭސް ޝީލްޑް އެޅުމާއި ރެސްޕިރޭޓްރީ ޕްރޮޓެކްޝަންވެސް ބޭނުން ކުރަން ޖެހޭނެ ކަމަށް އުސޫލުގައި ބުނެފައިވެ އެވެ. މަސައްކަތް ކުރަމުންދާ އިރު އުފެދޭ ކުނި ބޭރު ކުރުމުގައި އެ ކޯޕަރޭޝަނުން އަންގާ ގޮތަށް އަމަލު ކުރަން ޖެހޭ ކަމަށްވެސް އުސޫލުގައިވެއެވެ. އަދި ކެމިކަލް ފަދަ ތަކެތި ލިފްޓުން އުފުލޭނީ ރަނގަޅަށް ބަންދު ކުރުމަށްފަހުގައި ކަން ބަޔާންކޮށްފައިވާއިރު ލިފްޓަށް އެކަށީގެންވާ ބަރުދަނުގެ އެއްޗެއް ނޫނީ ލިފްޓުން އުފުލުމަކީ މަނާކަމެއް ކަމަށްވެސް ބަޔާންކޮށްފައިވެއެވެ.
