ހުޅުމާލެ ފޭސް 2 އެއްގެ ބަސް ސްޓޮޕްތައް ދެ ހަފުތާތެރޭ ނިމޭނެ ކަމަށް އެޗްޑީސީން ބުނެފިއެވެ.
ހައުސިން ޑިވޮލޮޕްމަންޓް ކޯޕަރޭޝަން އެޗްޑީސީން ބުނީ ފޭސް 2 އެއްގެ ބަސް ސްޓޮޕްތައް ހެދުމުގެ ނުވަދިހަ އިންސައްތަ މަސައްކަތް މިހާރުވަނީ މުޅިން ނިމިފައި ކަމަށެވެ. އެގޮތުން ބަސް ސްޓޮޕްތަކުގެ އޮނިގަނޑުގެ މަސައްކަތް ނިންމާ، މިހާރު ކުރަމުންދަނީ ކަރަންޓު ގުޅުމާ ފިނިޝިން މަސައްކަތްތަކެއް ކަމަށާއި މިމަހުގެ މެދުތެރެއާ ހަމައަށް، ބަސް ސްޓޮޕްތަކުން ހިދުމަތް ފެށޭވަރަށް ބަސް ސްޓޮޕްތަކުގެ މަސައްކަތް ނިމޭނެކަމަށް އެޗްޑީސީން ހާމަކުރެއެވެ.
ހިޔާ މަޝްރޫއުގެ ފްލެޓްތައް ނިންމާ ފްލެޓްތަކުގައި މީހުން ދިރިއުޅެން ފަށާފައިވާއިރު މިހާރު ދޫކޮށްފައިވާ ފްލެޓްތަކަށް 40 ހާހެއްހާ މީހުން ބަދަލުވާނެ ކަމަށް ކަމާ ބެހޭ ފަރާތްތަކުން ލަފާ ކުރެއެވެ. މިހާރު ފްލެޓްތަކަށް ކަރަންޓް ދިނުމުގެ މަސައްކަތްވެސް ބޮޑު ބައެއް ނިންމާލާފައިވާއިރު ބައެއް ފްލެޓްތަކުގައި މިހާރުވެސް މީހުން ދަނީ ދިރިއުޅެމުންނެވެ. އެޗްޑީސީން ހަމަޖައްސާފައިވާ ގޮތުން ފްލެޓްތަކަށް ކުލި ދައްކަން ޖެހެނީ 2022 ވަނަ އަހަރުގެ ޖެނުއަރީ މަހުއެވެ.
ގްރޭޓަރ މާލެ ސަރަޙައްދުގައި ބަހުގެ ޚިދުމަތް މިވަގުތު ދެމުން އަންނަީ އެމްޓީސީސީންނެވެ.
