ހިޔާ މަޝްރޫއުގެ ދަށުން އަޅާފައިވާ ފްލެޓްތަކުގެ ހުރިހާ ޓަވަރަކަށް ފެނާއި ކަރަންޓް ދީ ގްރޭސް ޕީއަރިއަޑް ގުނަން މިއަދު ފަށާފައިވާ ކަމަށް އެޗްޑީސީން ހާމަކޮށްފިއެވެ.
ހައުސިން ޑިވިލޮޕްމަންޓް ކޯޕަރޭޝަނުން ބުނީ ހިޔާ މަޝްރޫއުގެ ދަށުން ހުޅުމާލެ ފޭސް 2 ގައި އިމާރާތްކޮށްފައިވާ 6720 ފްލެޓްގެ އެއްބަސްވުމުގެ 8 ވަނަ މާއްދާގެ "ނ" ގައި ބަޔާންކޮށްފައިވާ ގޮތުން ފްލެޓް ގެ އެއްބަސްވުމުގައި ސޮއިކުރާއިރު އެ ޓަވަރަކަށް ފެނާއި ކަރަންޓްގެ ހިދުމަތް ލިބިފައި ނުވާނަމަ، ގްރޭސްޕީރިއަޑްގެ 3 މަސް ދުވަސް ގުނަން ފަށާނީ އެޓަވަރަކަށް ކަރަންޓާއި ފެނުގެ ހިދުމަތް ލިބުނުކަން ވިއްކާ ފަރާތުން އިއުލާންކުރާތާ ތާރީހުން ކަމަށެވެ.
އަދި މި ހިދުމަތް މިހާރު ހިޔާ ފްލެޓްތައް ހިމެނޭ ހުރިހާ ޓަވަރަކަށްވެސް ފޯރުކޮށްދީފައިވާތީ، 30 ސެޕްޓެމްބަރު 2021ގެ ނިޔަލަށް ފްލެޓްގެ އެއްބަސްވުމުގައި ސޮއިކޮށްފައިވާ ފަރާތްތަކުގެ ގްރޭސް ޕީރިއަޑް 1 އޮކްޓޫބަރު 2021 ފެށިގެން ހިނގަން ފަށާނެ ކަމަށެވެ.
މި ތިން މަސް ދުވަސްހަމަވުމަށް ފަހު އެއްބަސްވުމުގެ ދަށުން ދައްކަން ޖެހޭ އިންސްޓޯލްމަންޓް އަދި މެނޭޖްމަންޓް ފީ ހިނގަން ފަށާނެ ކަމަށްވެސް އެޗްޑީސީން ހާމަކުރެއެވެ.
ހިޔާ ފްލެޓްތަކުގައި މިހާރު ގިނަ އާއިލާތަކެއް ވަނީ ދިރިއުޅެން ފަށާފައެވެ.
