ހިޔާ ފްލެޓްވެރިން ކުނި އެޅުމަށް ހަ ސަރަހައްދެއް ހަމަޖައްސައިފައިވާ ކަމަށް އެޗްޑީސީން ހާމަކޮށްފިއެވެ.
ހުޅުމާލެ ފޭސް 2 އެއްގައި އިމާރާތްކޮށްފައިވާ ހިޔާ 7000 ގެ 16 ޓަވަރުން ފްލެޓް ލިބިފައިވާ ފަރާތްތަކުގެ ތެރެއިން މިހާރު ފްލެޓްގައި ދިރިއުޅެމުންދާ ފަރާތްތަކާއި އަދި ފްލެޓްތަކުގައި މަސައްކަތް ކުރަމުން ގެންދާ ފަރާތްތަކުގެ ގޭބިސީން އުފެދޭ ކުނިވާ ޒާތުގެ ކުނި، ވޭސްޓް މެނޭޖްމަންޓް ކޯޕަރޭޝަން އިން ރަސްމީކޮށް ހިދުމަތް ފެށެންދެން ކުނި އުކާލުމަށްޓަކައި 6 ސަރަހައްދެއްގައި ޑަސްބިން ވަނީ ބެހެއްޓިފައި ކަމަށެވެ.
އެހެންކަމުން ހިޔާ ފްލެޓް ލިބިފައިވާ ފަރާތްތަކުގެ ތެރެއިން މިހާރު ފްލެޓްގައި ދިރިއުޅެމުންދާ ފަރާތްތަކާއި އަދި ފްލެޓްތަކުގައި މަސައްކަތް ކުރަމުން ގެންދާ ފަރާތްތަކުން އެޓަވަރަކާއި އެންމެ ކައިރީގައިވާ ޑަސްބިން އަށް ކުނި އެޅުމަށް އެޗްޑީސީން ވަނީ އިލްތިމާސްކޮށްފައެވެ.
ކުނި ނެގުމަށް ހަމަޖެހިފައިވަނީ ކޮންމެ ދުވަހަކުވެސް ހެނދުނު 8 ކުން މެންދުރު 12 އަށް ކަމަށް އެ ކޯޕަރޭޝަނުން ހާމަކުރެއެވެ. އަދި މިހާރު ފްލެޓްގައި ދިރިއުޅެމުންދާ ފަރާތްތަކާއި އަދި ފްލެޓްގައި މަސައްކަތް ކުރަމުންދާ ފަރާތްތަކުން ގަޑިއަށް ސަމާލުކަން ދިނުމަށްވެސް އެޗްޑީސީން ވަނީ އެދިފައެވެ. މީގެއިތުރުންވެސް ހިޔާ ފްލެޓް އެތެރޭގެ އެއްވެސް ތަނެއްގައި އަދި ފްލެޓް ހިމެނޭ ސަރަހައްދުގައިވެސް ގޭބިސީން އުފެދޭ ކުނި ނުބެހެއްޓުމަށް ފްލެޓް ލިބިފައިވާ ފަރާތްތަކަށް އެޗްޑީސީން ވަނީ އިރުޝާދުދީފައެވެ.
