ދިވެހީން ބައިބައިކޮށް ދިވެހީންގެ ޒަމާންވީ އެކުވެރިކަމާ އެއްބައިވަންތަކަން ނަގާލީ ވެސް މި ސަރުކާރުން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ މިހެން ވިދާޅުވީ، ގައުމީ ދުވަހުގެ މުނާސަބަތުގައި ރައީސް ދެއްވި ހިތާބުގައި ނުރަނގަޅު ފިކުރުތައް ރާއްޖެއަށް ފަތުރައި، އިޖުތިމާޢީ އަދަބު އަހްލާގުގެ ހަފޮޅުން ބޭރުކޮށް ދިވެހިން ބައިބައިކުރުމަށް، ބަޔަކު ކެނޑިނޭޅި އެބަ މަސައްކަތްކުރާ ކަމަށް ވިދާޅުވެފައިވާތީ އެކަމަށް އިޝާރަތް ކުރެއްވި ޓުވީޓެއްގައެވެ. ރައީސް ވިދާޅުވީ، މިފަދަ ފިކުރުތަކަށް ފާޅުގައި ނޫނެކޭ ބުނެ، އަހްލާގީ އެންމެ މަތީ މިންގަނޑުގައި ސާބިތުވެ ތިބޭ ބައެއްގެ ގޮތުގައި، ދަރިން ތަރުބިއްޔަތު ކުރުމަކީ، ޒިންމާއެއް ކަމަށެވެ.
އަދުރޭ ކުރެއްވި ޓުވީޓްގައި ވިދާޅުވީ، މިނިވަންކަމާ ގައުމިއްޔަތު ވިއްކާލާ ދިވެހީން އަޅުވެތިކޮށް މި ރާއްޖޭގައި ދީނީ މިނިވަންކަން ދިނުމުގެ މަސައްކަތްކުރަނީ ހުދު މި ސަރުކާރުން ކަމަށެވެ.
އަޅުގަނޑުމެންގެ ގައުމީ ވާޖިބަކަށް ހަދަންވީ، ދިވެހިރާއްޖެއަށާއި ދިވެހިވަންތަކަމަށް، އަދި ދިވެހި ގައުމިއްޔަތަށް ލޯބިކުރާ ބައެއްގެ ގޮތުގައި، ދަރިން މުޖުތަމަޢަށް ނެރުމަށް ކަމަށާއި ދިވެހިވަންތަ ޝަޚްޞިއްޔަތެއްގެ ސިފަތައް، ކޮންމެ ދަރިއެއްގެ ކިބައިގައި ހަރުލައްވައިދިނުމަށް ކަމަށް ރައީސް ވިދާޅުވެފައިވެއެވެ.
