މަޝްހޫރު ތަމިލް ފިލްމު "ވިކްރަމް ވޭދާ" ގެ ހިންދީ ރީމޭކުގައި ލޯޔަރެއްގެ ރޯލުން ބަތަލާ ރާދިކާ އާޕްތޭ ފެންނާނެ ކަމަށް ރިޕޯޓުތައް ބުނެފި އެވެ.
ހިންދީ ރީމޭކުގައި ލީޑް ރޯލުން ފެންނާނީ ރިތިކް ރޯޝަން އާއި ސައިފް އަލީ ހާން އެވެ. މިއީ މިދެތަރިން އެކީގައި ފެންނަ ފުރަތަމަ ފިލްމުވެސް މެ އެވެ.
ކުރިއަށް އޮތް ދެމަހެއްހާ ދުވަހުގެ ތެރޭގައި ފިލްމުގެ ޝޫޓިން ފަށަން ތައްޔާރުވާއިރު ރާދިކާ ފިލްމުގައި ކުޅޭ ރޯލަކީ އެންމެ މުހިންމު އެއް ކެރެކްޓާ އެވެ. ރާދިކާގެ ކެރެކްޓާއަކީ ފިލްމުގައި ސައިފް ކުޅޭ ކެރެކްޓާގެ އަންހެނުންނެވެ.
"ވިކްރަމް ވޭދާ" ގެ ހިންދީ ރީމޭކް ޑައިރެކްޓު ކުރާނީ އޮރިޖިނަލް ފިލްމުވެސް ޑައިރެކްޓު ކުރި ޕުޝްކަރް އަދި ގާޔަތުރީ އެވެ. މިއީ މިދެ ޑައިރެކްޓަރުން ހިންދީ ފިލްމެއް ޑައިރެކްޓު ކުރާ ފުރަތަމަ ފަހަރެވެ.
އާރު މާދަވަން އަދި ވިޖޭ ސޭތުޕަތީ ލީޑް ރޯލުން ފެނިގެން ދިޔަ "ވިކްރަމް ވޭދާ" ރިލީޒް ކުރީ 2017 ވަނަ އަހަރު އެވެ. މިފިލްމަކީ ބޮކްސް އޮފީހުގައާއި ކްރިޓީކްސްގެ ގޮތުންވެސް ބޮޑު ކާމިޔާބީއެއް ހޯދި ފިލްމެކެވެ.
ހިންދީ ރީމޭކުގެ މިޔުޒިކް ހަދަނީ ވިޝާލް އަދި ޝޭކަރް އެވެ. ލިރިކްސްއާއި ޑައިލޮގު ލިޔަނީ މަނޯޖް މުންތަޝިރް އެވެ. މި ފިލްމު ރިލީޒް ކުރާނީ އަންނަ އަހަރުގެ ސެޕްޓެމްބަރު މަހު އެވެ.
