ހިޔާ ފްލެޓް އެއްބަސްވުމުގައި ސޮއިކުރެވޭނީ ބޭނުންވާ ހުރިހާ މައުލޫމާތެއް ހައުސިން ޑިވޮލޮޕްމަންޓް ކޯޕަރޭޝަނާއި ހިއްސާކޮށްފައިވާ ފަރާތްތަކަށް ކަމަށް އެ ކޯޕަރޭޝަނުން ބުނެފިއެވެ.
އެޗްޑީސީން ކޮށްފައިވާ އިއުލާނެއްގައި ބުނެފައިވަނީ، ތާވަލުކޮށްފައިވާކޮށްފައިވާ ގޮތަށް ޓަވަރު ތަރުތީބުން ސޮއިކުރުން ކުރިއަށް ގެންދަން ހަމަޖެހިފައިވީނަމަވެސް މިޓަވަރުތަކުން ފެލެޓް، ލިބިފައިވާ ފަރާތްތަކުގެ ތެރެއިން އެއްބަސްވުމުގައި ސޮއިކުރަން ތާވަލު ކުރެވޭނީ، އެއްބަސްވުން ތައްޔާރުކުރަން ކޮންމެހެން ބޭނުންވާ މައުލޫމާތު، ފުރިހަމަކޮށް އެ ކޯޕަރޭޝަނަށް ހުށަހަޅަފައިވާ ފަރާތްތަކަށް ކަމަށެވެ.
އެހެންކަމުން ފްލެޓް ލިބުނު ފަރާތްތަކުގެ މައުލޫމާތު ފޯމާއި، ފްލެޓްގެ ވެރިފަރާތުގެ ބަދަލުގައި އެއްބަސްވުމުގައި ޒިންމާ އަދާކުރާނެ ފަރާތެއް ހަމަޖެއްސުމަށް ކަނޑައަޅާފައިވާ ފޯމް ފުރިހަމަކޮށް ވީ އެންމެ އަވަހަކަށް ހުށައެޅުމަށް އެޗްޑީސީން ވަނީ އެދިފައެވެ.
އެޗްޑީސީން ބުނީ ޖުލައި 14 ވާ ބުދަދުވަހު އެއްބަސްވުންތަކުގައި ސޮއިކުރަން ފެށި ނަމަވެސް އަދިވެސް ތަނަށް ބޭނުންވާ ކަރަންޓާއި ފެނުގެ ހިދުމަތް ފޯރުކޮށްދިނުމުގެ މަސައްކަތް ނިމިފައިނުވާކަމަށެވެ. އެހެންކަމުން އެއްބަސްވުމުގެ ދަށުން ފްލެޓަށް ފައިސާ ދައްކަން ފަށާ މުއްދަތު " ގްރޭސް ފީރިއެޑް" ގެ 3 މަސްދުވަސް ގުނަން ފަށާނީ ކަރަންޓާއި ފެނުގެ ހިދުމަތް ދެވުމުންކަމަށްވެސް އެޗްޑީސީން ހާމަކުރެއެވެ. އަދި ކަރަންޓްގެ ހިދުމަތް އެއްކޮށް ފުރިހަމަ ނުވަނީސް ޓަވަރުތަކުގެ ލިފްޓުތައް ބޭނުންކުރުމަކީ އެންމެ ރައްކާތެރިކަމަކަށް ނުވާނެތީ ފްލެޓް ބޭނުންކުރަން ހުޅުވާލާނީ ކަރަންޓް ދީ ނިމުމުންކަމަށްވެސް އެޗްޑީސީން ވަނީ ބުނެފައެވެ.
އަދި ގުރުއަތުން ލިބިފައިވާ ފްލެޓް ބަދަލު ކުރުމަށް ގިނަ ފަރާތްތަކަކުން އެދިފައިވާ ކަމަށާއި މައުލޫމާތު ބަދަލުކޮށް އެއް ފްލެޓް އަނެއް ފްލެޓާއި ބަދަލު ކުރުމަކީ ގިނަ ވަގުތުތަކެއް ހިނގާނެ ކަމަކަށް ވާނެތީ ފްލެޓް ބަދަލުކުރުމުގެ ފުރުސަތު މިވަގުތު ދެވެން އޮތީ ކުރިންވެސް ނިންމާފައިވާ ގޮތަށް އެއް ފަރާތަކާއި އެކު ކަމަށް އެޗްޑީސީން ބުނެއެވެ. ނަމަވެސް އެއްބަސްވުމުގައި ސޮއިކުރުމަށްފަހު ފްލެޓް އެހެން ފަރާތަކާއި ބަދަލު ކުރެވޭނެ އުސޫލު އިއުލާން ކުރާނެ ކަމަށްވެސް އެޗްޑީސީން ހާމަކުރެއެވެ.
